རྟ་ཕོ་རག་བྱ་གསེར་མགོ༼བཀྲ་ཤིས་ལྷ་མོ།༡༧འཛིན་གྲྭ༽

​བཀྲ་ཤིས་ལྷ་མོ། དམའ་གཅིག་འཛིན་གྲྭ་བདུན་པ།

ང་ནི་གཡུ་མདོག་གི་རྩྭ་ཐང་ཕ་མཐའ་བྲལ་ཅིང་ཕྱུགས་རིགས་དཀར་ནག་ནམ་མཁའི་སྐར་ཚོགས་བཞིན་བཀྲམ་པའི་ཡངས་བའི་འབྲོག་ཐང་ནས་འཚར་ལོངས་བྱུང་བ་ཡིན་པས། སྒོ་ཕྱུགས་རྟ་ནོར་ལུག་གསུམ་ལ་འདང་རྩིས་ཧ་ཅང་ཆེ།

ང་ཚོའི་སྡེ་བ་ནི་ཕྱུགས་རིགས་དཀར་ནག་གི་འཕེལ་ཁ་རྒྱས་ཤིང་སྒོས་སུ་རྟ་ཕོར་འདང་རྩིས་ཆེ་བས་རྟ་དང་རྒོད་མ་མེད་པའི་ཁྱིམ་ཚང་ཞིག་ཕལ་ཆེར་མེད་ཅེས་བཤད་ཆོག་ལ། དེ་ལས་ཀྱང་ཁྱིམ་ཚང་མང་ཆེ་བའི་རྟ་ནི་རྒྱུག་གོམ་ལག་རླུང་ལྟར་མྱུར་བའི་རྒྱུག་རྟ་རྐྱང་རྐྱང་ཡིན།  ངེད་ཚང་གི་རྟ་ཕོའང་འགྲོས་གོམ་ལག་དང་རྒྱུག་བང་རྩལ། ཕྱིའི་སྤུ་ཁ་གང་གི་ཐད་ནས་བལྟས་ཀྱང་དེ་དག་གི་ཡན་ཞིག་མིན་ནའང་དམན་ཞིག་གཏན་ནས་མིན།  ངེད་ཚང་གི་རྟ་ཕོའི་ལུས་བོངས་ཆེ་རྒྱུ་མེད་ལ་ཆུང་རྒྱུའང་མེད་པར་ཚད་དང་རན་པ་ཞིག་ཡིན་ལ་རྣ་བ་ཅུང་ཟད་རིང་། སྤུ་མདོག་སེར་ལ་ནག་ཞད་ཅུང་ཆེ་བས་རག་རག་ཅིག་ཡིན་ལ་མགོའི་སྤུ་མདོག་ནི་ཅུང་སེར་ཤོས་ཆེ་བས། ཨ་ཕས་རྟ་ཕོའི་ཕྱིའི་སྤུ་མདོག་ལ་བརྟེན་ནས་རག་བྱ་གསེར་མགོ་ཞེས་པའི་དེ་མཚུངས་ཀྱི་མིང་ཡང་སྙན་མོ་ཞིག་བཏགས་ཡོད།  རག་བྱ་གསེར་མགོ་ངེད་ཚང་གི་རྒོད་མས་བཙས་བ་ཡིན་པས་དེ་ནི་གཞན་ལག་ནས་ཉོས་པ་ལྟ་བུ་མིན་པར་རང་གི་ལག་སྐྱེས་ཀྱི་རྟ་ཕོ་རྩིས་ཆེན་ཞིག་ཡིན།  དེ་བས་ངེད་ཚང་གི་ཁྱིམ་མི་སུ་ཡིན་ཡང་རག་བྱ་གསེར་མགོ་ལ་ཆ་རྒྱུས་དང་བརྩེ་འདང་ཡང་ཟབ་མོ་ཞིག་ཡོད་པ་སྨྲས་མ་དགོས། 

ལོ་རེའི་དབྱར་ཟླ་མ་ཚེས་སྔོན་ནས་ཨ་ཕ་དང་ཕུ་བོ་གཉིས་ཀྱིས་རག་བྱ་གསེར་མགོ་གསོས་ནས་རྟ་རྒྱུགས་ལ་ཞུགས་པར་གྲ་སྒྲིག་གང་ལེགས་བྱེད་པ་རེད། དུས་རྒྱུན་རྟ་རྒྱུག་འགྲན་སྡུར་ཆེ་མ་ཆུང་གསུམ་གང་ཡིན་ཡང་འགྲན་སྡུར་ལ་ཞུགས་ཐེངས་རེ་རེར་རག་བྱ་གསེར་མགོ་ཨང་དང་པོ་མིན་ན་གཉིས་པ་ཡིན་སྲིད།  རྟ་ཕོ་རག་བྱ་གསེར་མགོ་རྡུལ་འཚུབ་གྱུ་ལེར་རྒྱུག་མགོར་མཆོངས་ནས་ཡོང་ཐེངས་རེར་ངའི་སེམས་པའང་དྲག་ཏུ་མཆོངས་ལྡིང་བྱེད་ལ་ནམ་རྒྱུན་བཤད་མི་ཤེས་པའི་ཚོར་བ་ཁྱད་པར་བ་ཞིག་ཀྱང་སྐྱེས་ཡོང་།   རྟ་རྒྱུག་འགྲན་སྡུར་ལ་ཞུགས་ཐེངས་རེར་རྟ་ཕོ་ཞོན་མཁན་ནི་ངའི་ཕུ་བོ་ཡིན་ཏེ། ཁོ་ནི་ལུས་ལྡེམ་མྱུར་དང་རྩལ་ཤུགས་ལྡན་པའི་ཕོ་རྒོད་ཅིག་ཡིན་པས། ཁོ་རང་མེད་ན་མི་གཞན་ཞིག་གིས་རག་བྱ་གསེར་མགོའི་མགོ་ལ་སྲབ་འཇོག་རྒྱུའང་དེ་འདྲའི་སླ་མོ་ཞིག་ག་ལ་ཡིན།   དྲང་མོར་བཤད་ན་ང་ཡང་རྟ་ལ་ཞོན་རྒྱུར་ཧ་ཅང་དགའ་མོད། རག་བྱ་གསེར་མགོའི་མཆོངས་རྩལ་དང་གཏུམ་ཞིང་རྩུབ་པའི་སྤྱོད་པ་དེ་མཐོང་ན་ཞོན་རྒྱུ་ཕར་ཞོག་གམ་ལ་བཏུད་རྒྱུར་ཡང་སྙིང་རྩ་འདར་བ་ཞིག་རེད།    དེ་ལྟ་ནའང་། ང་ནི་ནམ་ཡང་རག་བྱ་གསེར་མགོའི་ཉམས་པ་མེད་པའི་ཟིལ་ཤུགས་དང་འགྱུར་བ་མེད་པའི་སྙིང་སྟོབས་ལ་སྨོན་པ་དང་ཡི་རང་གཏིང་ནས་སྐྱེས་ཡོང་།

རྟ་ཕོ་ཡ། རག་བྱ་གསེར་མགོ    མཆོངས་ཤིག    ཁྱོད་ལ་རླུང་ལས་མྱུར་བའི་བང་རྩལ་དང་བྲག་ལས་སྲ་བའི་སྙིང་སྟོབས་ཡོད།