ཚེ་བརྟན་རྡོ་རྗེ། དམའ་གཅིག་འཛིན་གྲྭ་བདུན་པ།
མི་སུ་ཡིན་རུང་རང་ཉིད་ཀྱི་ཕ་ཡུལ་ནི་གཞན་ལས་ཁྱད་དུ་འཕགས་པ་ཞིག་ཡིན་པར་འདོད་པ་སྨྲས་ཅི་དགོས། ཕ་ཡུལ་ནི་ལྟེ་ཁྲག་ས་ལ་འཕོ་ས་དང་ངུ་ངག་གི་དབྱངས་རྟ་ཐོག་མར་གྱེར་སའང་ཡིན།
མུ་མཐའ་བྲལ་བའི་རྩྭ་ཐང་དང་མཐོ་ཞིང་བརྗིད་པའི་རི་འདབས་སུ། གཡང་དཀར་ལུག་གི་འབའ་སྒྲ་དང་ཅང་ཤེས་རྟ་ཕོའི་འཚེར་སྐད། དགོ་དགོ་འབྲི་མོའི་ངུར་སྒྲ་དང་ལྷན་དུ་རྫི་གླུ་སིང་སིང་གྲགས་པའི་འབྲོག་སྡེ་ཕྱུག་མོ་དེ་རུ་ངའི་རྩེད་ར་གྲུ་བཞིའི་རྗེས་ཤུལ་ཡོད་ལ། ཉིན་མཚན་མེད་པར་མདུན་དུ་རྒྱུག་བཞིན་པའི་ཆུ་ཕྲན་དེས་ང་ལ་ཁོ་རང་ནང་བཞིན་འདུག་དབང་མེད་པར་མདུན་སྐྱོད་བྱེད་དགོས་པའི་ངར་ཤུགས་དང་སྤོབས་པ་བསྩལ་ཡོད།
དེ་ཡང་དུས་ཀྱི་འཁོར་ལོ་བར་མེད་དུ་འཁོར་ཞིང་ཚན་རྩལ་གློག་དམར་འཁྱུག་པ་ལྟར་འཕེལ་རྒྱས་སུ་འགྲོ་བཞིན་པའི་དུས་སྐབས་འདིར། ཏང་གི་སྲིད་ཇུས་གསར་བའི་འོག་ངའི་ཕ་ཡུལ་ལའང་འགྱུར་ལྡོག་མང་བོ་ཞིག་བྱུང་ཡོད་དེ། ཕ་མེས་ཡང་མེས་ནས་རྒྱུད་འཛིན་བྱས་པའི་སྦྲ་ནག་ཅན་གྱི་ཁྲི་སྡེ་རིམ་བཞིན་དྲོལ་ཁོལ་ལྡན་པའི་ཁང་བཟང་དུ་གྱུར་སོང་ལ། སྔར་འགྲིམ་འགྲུལ་ཡོ་བྱད་ནོར་གནག་དང་ཅང་ཤེས་རྟ་ཕོ་ཙམ་ལ་བརྟེན་དགོས་པའི་དུས་སྐབས་དེ་མཇུག་རྫོགས་ཏེ། མགྱོགས་འགྲོ་རླངས་འཁོར་དང་འཕྲུལ་རྟས་ཚབ་བྱས་ཡོད། ད་དུང་ག་ས་གང་དུ་གློག་སྐུད་པ་ཏྲའི་རི་མོ་ཇི་བཞིན་འཐེན་ཡོད་པས། བལྟས་བལྟས་ལ་ངའི་ཕ་ཡུལ་ནི་འབྱོར་ཕྱུག་ལྡན་པ་ཞིག་ཏུ་གྱུར་དང་འགྱུར་བཞིན་ཡོད་ལ། རྨི་ལམ་ཁྲོད་ཀྱི་ཞིང་ཁམས་བཞིན་བདེ་སྐྱིད་དང་དཔལ་ཡོན་གྱིས་ཕྱུག་ཡོད།
ད་དུང་། རླབས་ཆེན་མེས་རྒྱལ་གྱིས་དངོས་ཤུགས་དང་རྒྱུ་ཤུགས་མང་བོ་ཞིག་བཀོལ་ནས་ཕ་ཡུལ་གྱི་རང་མདངས་དྲོན་མོ་སྲུང་སྐྱོབ་བྱས་པས། ཕ་ཡུལ་གྱི་པང་ནས་ལྟེ་ཁྲག་འཕོས་ཤིང་འཚར་ལོངས་བྱུང་བའི་ང་དང་ང་ལྟ་བུའི་གཅེས་ཕྲུག་དག་གིས་ཕ་ཡུལ་གྱི་ཚབ་ཏུ་མ་ཡུམ་མེས་རྒྱལ་གྱི་སྐུ་ལུས་པདྨའི་སྡོང་བོ་ལ་ནག་ནོག་གི་དྲི་མས་མི་གོས་པའི་སྨོན་འདུན་ཡང་ཡང་ཞུ་བ་དང་། མ་འོངས་པར་ཁྲིམས་ལུགས་ལ་བརྩི་སྲུང་དང་མི་ཡ་རབས་དཔེ་ལེགས་ཅན་ཞིག་བྱེད་རྒྱུ་ཡིན་ཏེ། འདི་ནི་ང་ཚོའི་མི་རབས་འདིའི་འགན་འཁྲིའང་ཡིན།
རྩོམ་ཡིག་འདི་ནི2022ལོར《གངས་རྒྱན་ན་ཆུང་ཚགས་པར》སྟེང་བཀོད་ཡོད།