ཕྱུག་མཚོ་སྐྱིད།དམའ་གཅིག་འཛིན་གྲྭ་དང་པོ།
མེ་ཏོག
དཔྱིད་ཀྱི་བུ་མོས་འཕྱོར་སྒེག་གི་གོམ་སྟབས་སྒྱུར་བཞིན་མཉེན་ལྕུག་རྒྱ་ལྕང་གི་ཡལ་འདབ་དང་སྣ་བརྒྱའི་མེ་ཏོག་ལ་བྱིལ་བྱིལ་བྱེད་དུས་ངའི་ཕ་ཡུལ་ནི་མཛེས་སྡུག་གི་འཇིག་རྟེན་ཁྱད་པར་བ་ཞིག་གོ།།
ལྗོན་ཤིང་།
དཔྱིད་རླུང་ཁད་ཀྱིས་ལྡང་ཞིང་ཉི་འོད་བགས་ཀྱིས་འཕྲོས་ཏེ་གཡུ་ལོ་ཐགས་སུ་བཀྲ་བའི་ལྗོན་པ་རྣམས་དྲི་གཞོན་རླུང་གིས་བསྒུལ་ན།ཉམས་བརྒྱད་རྫོགས་པའི་གར་མཁན་མ་རྣམས་སྟར་ཕྲེང་བསྒྲིགས་ནས་བདག་གི་ཕ་ཡུལ་ལ་བསུ་མ་བྱེད་པ་དང་ཀུན་ནས་མཚུངས།
ཆུ་བོ།
ཡུན་རིང་གཉིད་དུ་ཡུར་བའི་རྩེ་ཆུ་སྔོན་མོ་ནི་འཁྱགས་རོམ་གྱི་སྦུབས་རྒྱ་ལས་གྲོལ་ཞིང་། གཡུ་འབྲུག་སྔོན་མོ་ཐང་ལ་ལྷུང་བ་དང་འདྲ་བར་གང་སར་རྒྱུ་བཞིན་ཡོད་པས། གཡུང་དྲུང་གི་རི་མོས་ཕ་ཡུལ་གྱི་བཞིན་རས་ལ་མཛེས་སྡུག་གི་སྣང་བརྙན་གསོན་པོ་ཞིག་ཕབ་པ་དང་མཚུངས།
རི་བོ།
རྒྱང་རིང་གི་མཐོ་དམའ་མི་སྙོམས་ཤིང་རྩེ་མོ་ནམ་མཁའི་དབྱིངས་སུ་ཟུག་པའི་ས་འཛིན་གྱི་རི་བོ་ཕྲེང་བསྒྲིགས་པའི་ཁྲོད་དུ། དབུ་རྩེ་གངས་ཀྱི་གཡོགས་ཤིང་བར་མཚམས་ནགས་ཀྱིས་བརྒྱན་ལ། འདབ་འོག་སྤང་ལྗོངས་ཀྱིས་བཟུང་བའི་བྲག་དཀར་ཆོས་བརྩིགས་རི་བོ་ནི་ཡུལ་མི་རྣམས་ཀྱི་སེམས་ཁོང་ན་དུས་གཏན་དུ་གསོན་ཡོད་དོ།།
2022ལོའི་ཟླ12པའི་ཚེས10ཉིན་གྱི《གངས་རྒྱན་ན་ཆུང་ཚགས་པར》སྟེང་བཀོད།