བྱིས་པའི་མིག་ཟུང་རྒྱང་སྒྲིབ་སྔོན་འགོག་ཅི་ལྟར་བྱེད་དགོས།

རྒྱང་སྒྲིབ་སྔོན་འགོག་ཚོད་འཛིན་དང་ཐ་ན་ལོ་ཆུང་བྱིས་པའི་གཟུགས་གཞིའི་ལུས་སྟོབས་མཐོ་རུ་གཏོང་བར“རྒྱལ་ཁབ་ཀྱི་འགུལ་སྐྱོད”དགོས་པ་མ་ཟད། ལྷག་པར་དུ་སྤྱི་ཚོགས་སོ་སོས་ཧུར་ཐག་གིས་དང་ལེན་དང་གཞོགས་འདེགས་བྱེད་དགོས་པ་དང་ཁྱིམ་ཚང་དང་ཁྱིམ་བདག་གིས་རང་རྟོགས་ངང་འབད་བརྩོན་བྱེད་དགོས། ཕྲུ་གུ་ཕྱི་རོལ་ནས་ལུས་རྩལ་སྦྱོང་བརྡར་བྱེད་པར་རྩ་འཛུགས་བྱེད་པ་དང་། སྦྱོང་བརྡར་ཁོར་ཡུག་བཟང་བོ་བསྐྲུན་པ། ལུས་རྩལ་སྦྱོང་ཡུལ་གྱི་ར་བ་མཁོ་འདོན་བྱེད་པ་དང་དེ་ལ་ཆ་རྐྱེན་བསྐྲུན་པ། ཁྱིམ་ཚང་གིས་བྱིས་པར་གློག་རྡུལ་གློག་བརྙན་སོགས་སྟོན་པའི་སྒྲིག་ཆས་མཁོ་འདོན་བྱ་རྒྱུ་ཇེ་ཉུང་དུ་གཏོང་དགོས་པ་མ་ཟད། ལུས་རྩལ་ཡོ་བྱད་མང་ཙམ་བསྒྲིགས་དགོས་པ། ཁྱིམ་བདག་ཚོས་བྱིས་པའི་སློབ་གསོའི་ཐད་ཀྱི་སེམས་ཁྲལ་ཇེ་ཉུང་དུ་གཏོང་དགོས་པ། སློབ་སྦྱོང་ལ་སེམས་ཁུར་བྱེད་པའི་ཁྲོད་ཕྲུ་གུའི་མིག་ཤེལ་གོན་པ་དང་གཟུགས་པོའི་བདེ་ཐང་ལའང་མཐོང་ཆེན་བྱེད་དགོས་པས། ཕྲུ་གུ་ཚོ་ཕྱི་རོལ་དུ་སོང་སྟེ་རྩེད་འཇོ་ལ་རོལ་བར་སྐུལ་ལྕག་བྱེད་པ་ནི་ངེས་དོན་གྱི་བྱིས་པའི་མིག་ཟུང་ལ་གཅེས་སྐྱོང་ཡག་པོ་བྱེད་པའི་ཐབས་ལམ་བཟང་པོ་ཞིག་ཡིན།

མིག་སྔར་ཁྲོམ་རའི་ཐོག་འཚོང་བཞིན་པའི“འོད་སྔོན་པོ་དང་ལྡེམ་འོད་མེད་པའི”མིག་སྲུང་གློག་སྒྲོན་ལ་ཆེད་མཁས་པས་དེ་རིགས་ཀྱི་དྲིལ་བསྒྲགས་སྐད་ཆ་ལ་གནད་དོན་འདུག་ཅེས་བཤད། འོད་སྔོན་པོ་མེད་པར་བཟོ་བ་ནི་དགོས་པ་མེད་པ་ཞིག་ཡིན་ཏེ། འོད་སྔོན་པོ་ནི་རང་བྱུང་འོད་ཀྱི་གྲུབ་ཆ་གལ་ཆེན་ཞིག་ཡིན། འོད་སྔོན་པོ་ལ་དེ་འདྲའི་གནོད་པ་མེད་པས་རྩ་བ་ནས་མེད་པར་བཟོ་དགོས་པ་ཞིག་མིན། གཙོ་བོ་ཚད་ལས་མ་བརྒལ་ན་རུང་། ཁྱིམ་བདག་གིས་བྱིས་པར་འོད་སྔོན་འགོག་པའི་མིག་ཤེལ་གྱོན་དུ་བཅུག་པ་དེས་དེ་ལས་ལྡོག་སྟེ་སྣ་མང་ཕུན་སུམ་ཚོགས་པའི་མཐོང་ཚོར་གྱི་འཇིག་རྟེན་ལ་ནོར་འཁྲུལ་བྱུང་དུ་འཇུག་སྲིད་པས་དགོས་པ་མེད་དོ། མིག་ཤེད་ལ་སྲུང་སྐྱོང་བྱ་རྒྱུ་དེ་འོད་ཁུངས་ཡག་པོ་སྤྱོད་པ། འོད་ཡག་དག་པར་སྤྱོད་པ་དང་དུས་མཚུངས་སུ་ཉིན་ལྟར་ཆུ་ཚོད་2ཡན་ལ་ཕྱི་རོལ་དུ་འགུལ་སྐྱོད་བྱེད་པ་དང་། མིག་ཟུང་དང་བར་ཐག་ཉེ་བའི་ལས་ཀ་སྐར་མ་20བྱས་རྗེས་མགོ་བོ་བཏེགས་ནས་རྒྱང་རིང་ཕྱོགས་ལ་སྐར་ཆ20བལྟས་ཏེ་མིག་གི་ངལ་དུབ་གསོ་དགོས་པ་ཡིན།