རྩེ་ཁོག་ནས༼རྨ་ལྷོ་རྣམ་ཐར་ཟློས་གར༽གྱི་ཟབ་སྦྱོང་འཛིན་གྲྭ་བསྡུས།

    ཟླ་འདིས་ཚེས༡ནས༡༠བར་རྩེ་ཁོག་རྫོང་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་གཙོ་སྒྲུབ་དང་རྩེ་ཁོག་རྫོང་རིག་གནས་དཔེ་མཛོད་ཁང་གིས་འགན་སྒྲུབ་ཀྱིས་རྩེ་ཁོག་རྫོང་ཧོར་གྲོང་རྡལ་ཧོར་སྡེ་བའི་དམངས་ཁྲོད་རྣམ་ཐར་ཟློས་གར་ཚོགས་པ་དང་། ཉིན་ཤུག་ཞང་མགོ་དགེ་དགོན་པའི་རྣམ་ཐར་ཟློས་གར་ཚོགས་པ། རྫོང་གེ་སར་རྣམ་ཐར་ཟློས་གར་ཚོགས་པ། རྫོང་མི་རིགས་སློབ་འབྲིང་ལོ་ཆུང་གཞོན་ནུའི་རྣམ་ཐར་ཟློས་གར་ཚོགས་པ་བཅས་ནས་གཙོ་འཁྲབ་པ་མི༤༠ལྷག་ཟབ་སྦྱོང་ལ་ཞུགས། 

    བོད་རང་སྐྱོངས་ལྗོངས་ལྷ་མོ་ཟློས་གར་ཚོགས་པའི་རྒྱལ་ཁབ་རིམ་པ་དང་པོའི་རོལ་ཆ་གཏོང་མཁན་བཀྲ་ཤིས་དབང་རྒྱལ་དང་། བོད་རང་སྐྱོངས་ལྗོངས་ལྷ་མོ་ཟློས་གར་ཚོགས་པའི་འཁྲབ་སྟོན་པ་དབང་རྒྱལ་རྣམ་གཉིས་ཐེངས་འདིའི་ཟབ་སྦྱོང་དགེ་རྒན་ལ་གདན་དྲངས་ནས་བོད་ཀྱི་རྣམ་ཐར་ཟློས་གར་གྱི་བྱུང་རིམ་དང་དབྱེ་བ། འཁྲབ་སྟངས་དང་རྔ་སྦུག་རོལ་མོའི་གཞུང་ལུགས་དང་ལག་ལེན། འཁྲབ་སྟོན་བྱེད་སྟངས་སོགས་གཞུང་ལུགས་དང་ལག་ལེན་སྦྲེལ་ནས་སློབ་ཁྲིད་བྱས། ཐེངས་འདིས་ཟབ་སྦྱོང་ལས་དམངས་ཁྲོད་རྣམ་ཐར་ཟློས་གར་ཚོགས་པ་སོ་སོའི་རྐང་འཛིན་འཁྲབ་སྟོན་མི་སྣའི་འཁྲབ་སྟངས་དང་རྔ་སྦུག་རོལ་མོའི་རམ་འདེགས་བྱེད་སྟངས་སོགས་ལ་སྔར་ལས་ལྷག་པའི་ངོས་འཛིན་གསར་པ་ཐོན།