བྱིས་པར་གནོད་པའི་བྱ་བྱེད་འགའ།

   བཞི། ཕ་མའི་སེམས་འཚབ་ན་བྱིས་པའི་བློ་སྒྲིམ་མི་ཐུབ།

   དགའ་སྐྱོ་ཆགས་སྡང་སོགས་ཡིད་ཀྱི་འགྱུར་བ་མེད་ན། མིའི་འཚོ་བ་ལ་སྤྲོ་སྐྱིད་ལྡན་མི་སྲིད་ལ། མི་ཚེ་ཡང་འཕྲུལ་ཆས་ཀྱི་འཁོར་སྐྱོད་ལྟ་བུ་ཞིག་ཡིན་ངེས། ཡིན་ན་ཡང་། ཡིད་ཀྱི་འགྱུར་བ་དེ་དག་གིས་ང་ཚོའི་འཚོ་བ་ལ་སྤྲོ་སྐྱིད་ཀྱི་ཁ་དོག་སྣོན་པར་མ་ཟད། སྡུག་བསྔལ་གྱི་སྤྲིན་པའང་འཐིབ་པར་བྱེད། དགའ་དུས་མཛའ་བརྩེ་ལྡན་ཞིང་དཀྱེལ་ཡངས་ལ། ཁྲོ་དུས་ཚིག་རྩུབ་ལ་ཞེ་གནག དེ་བས་འཚོ་བ་ལས་ཐོབ་པའི་ཉམས་མྱོང་གིས་ང་ཚོར་སོ་སོའི་སེམས་ཁམས་ལ་བདག་པོ་གང་ལེགས་བརྒྱབ་རྗེས་ད་གཟོད་གནད་དོན་ལ་བདག་བྱེད་དགོས་པའི་གནས་ལུགས་བསྟན་ཡོད། གནད་དོན་ཐག་གཅོད་བྱེད་སྐབས་སེམས་ཁམས་འཚབ་འཚུབ་དང་ཡང་ན་ཁྲོས་ཐོག་དང་སྐྱོ་ཐོག་ནས་ཐག་གཅོད་བྱེད་མི་རུང་། ད་ལྟའི་བྱིས་པ་ལ་ལ་ནི་ཏག་ཏག་དེ་འདྲའི་ལྷོད་བག་བྲལ་བའི་སེམས་ཁམས་ཀྱི་འཚུབ་ཆ་རྒོད་པའི་ཁྱིམ་ཚང་ནས་འཚར་ལོངས་འབྱུང་བཞིན་ཡོད་ལ། བྱིས་པ་དེ་རིགས་ཀྱི་བློ་རྩེ་གཅིག་ཏུ་སྒྲིམ་དཀའ་བ་དང་། རིག་པ་འཁྱར་འཁྱོལ་དུ་གནས།

   ལྔ། ཕ་མའི་འབྲེལ་བ་ཞན་ན་བྱིས་པའི་མཐུན་སྦྱོར་མི་ནུས།

   ཕ་མ་གཉིས་ཀྱི་འབྲེལ་བ་མི་བཟང་བར་རྒྱུན་དུ་ཁ་འཛིང་ལག་འཐབ་ཀྱི་ངང་ནས་འཚོ་བ་ཡིན་ན། བུ་ཕྲུག་རྣམས་ཀྱི་སེམས་ལ་བདེ་སྣང་མེད་པར་གྱུར་ཏེ། ཡུན་རིང་འགོར་ན་གཤིས་ཀ་གཡུང་ལ་མི་དང་འབྲེལ་འདྲིས་བྱེད་པར་མི་དགའ་བར་འགྱུར་བ་དང་། བྱིས་པའི་རྩ་འཛུགས་མཐུན་སྦྱོར་གྱི་ནུས་པའང་ཇེ་ཞན་ནས་ཇེ་ཞན་དུ་འགྲོ་བ་ཡིན། བྱིས་པ་བདེ་ཐང་གིས་འཚར་ལོངས་འབྱུང་བ་ལ་ཕ་མའི་བྱམས་བརྩེའི་གཉོར་སྐྱོང་དང་འབྲལ་ཐབས་མེད་ལ། འཆམ་མཐུན་ཞི་འཇགས་ཀྱི་ཁྱིམ་ཚང་གི་ཁོར་ཡུག་གིས་བྱིས་པའི་འཚར་ལོངས་ལ་ཡར་འདེགས་ཀྱི་ནུས་པ་ཐོན། ཁྱིམ་ཚང་གི་སློབ་གསོ་དེ་ཁྱིམ་ཚང་གི་འབྲེལ་བའི་སློབ་གསོ་ཡང་ཡིན། འབྲེལ་བ་ནི་ཁྱིམ་ཚང་དང་ཁྱིམ་ཚང་སློབ་གསོའི་གནད་འགག་ཡིན། འབྲེལ་བ་མ་བཟང་ན་སློབ་གསོ་གླེང་ཐབས་མེད། ཁྱིམ་ཚང་གི་འབྲེལ་བ་ཡག་པོ་ནི་བྱིས་པའི་རྗེས་ཕྱོགས་ཀྱི་འབྲེལ་བ་འཛིན་ཕྱོགས་དང་འབྲེལ་བ་མཐུན་སྦྱོར་གྱི་རྩ་བ་ཡིན།

   དྲུག ཕ་མར་སྒེར་སེམས་ཆེ་ན་བྱིས་པར་གདུང་སེམས་མེད།

  ཕ་མ་རྣམས་ཀྱི་བྱ་བྱེད་ཐམས་ཅད་སྒེར་སེམས་འབའ་ཞིག་གི་དབང་དུ་གྱུར་ཏེ། རང་ལ་འབྲེལ་བ་མེད་པ་ཐམས་ཅད་མི་མཐོང་བར་བྱེད་པ་དང་། རང་ལ་འབྲེལ་བ་ཡོད་ན་ཁེ་ཕན་ཁབ་རྩེ་ཙམ་གྱི་དོན་དུ་ཡང་རྩིས་ཐང་ཐད་ལ་འབོར་བར་ཐེ་ཚོམ་མེད་པ་ཡིན་ན། བྱིས་པ་རྣམས་ཀྱང་གདུང་སེམས་དང་གཅེས་སེམས་མེད་པར་གྱུར་ཏེ། དབུལ་ཕོངས་ལ་སྦྱིན་པའི་སེམས་དང་ཉམ་ཆུང་ལ་རོགས་བྱེད་པའི་འདུན་པ་མེད་པའི་མི་སེམས་སྐམ་པོ་ཅན་ཞིག་ཏུ་འགྱུར་བར་ངེས།

   བདུན། འཁང་སེམས་ཆེ་ན་བྱིས་པར་འགན་འཁྲིའི་སེམས་མེད།

   ལས་ཁུངས་ནས་མགོ་ཁྲིད་ལ་འཁང་ར་དང་། ཁྱིམ་ནས་བྱིས་པར་འཁང་ར་བྱེད་པ། གང་ལྟར་ནམ་ཡང་རང་ཉིད་ཀྱིས་གྱོང་རེག་པ་ལྟར་བྱེད་པ། གྲུབ་འབྲས་ཡོད་ན་རང་གི་དྲིན་གྱིས་ཡིན་པ་དང་། སྐྱོན་ཡོད་ཚེ་གཞན་ལ་དཀྲི་རྐྱང་བྱེད་པའི་མི་དེ་འདྲའང་རྒྱུན་དུ་མཐོང་རྒྱུ་ཡོད་ལ། ཕ་མ་ལ་ལའང་མི་དེ་འདྲའི་རིགས་སུ་གྱུར་པ་སྨོས་མེད་ཡིན་པས་ན། ཕ་མ་དེ་རིགས་ཀྱི་བྱ་བྱེད་དེ་རིགས་ཀྱིས་བྱིས་པ་འགན་འཁྲིའི་སེམས་མེད་པ་ཞིག་ཏུ་སྐྱེད་སྲིང་བྱེད་ངེས་པ་རྒྱུ་འབྲས་དང་མཐུན་པ་ཞིག་གོ།

   དགུ། མི་གཞན་ལ་བསྡུར་བ་བྱས་ན་བྱིས་པའི་རང་རྟོན་ཉམས།

   ཕ་མ་ལ་ལས་བྱིས་པའི་ཡོན་ཏན་མི་མཐོང་བར་རྒྱུན་དུ་བྱིས་པའི་སྐྱོན་ཆ་བརྩི་བར་བྱེད་ལ། ཁོར་ཡུག་ལ་མི་བལྟ་བར་བྱིས་པར་སྐྱོན་མཚང་འདྲུ་བ་དང་རྡུང་རྡེག་བྱེད་པའང་ཡོད། དེ་ལས་ཀྱང་བྱིས་པ་གཞན་པའི་ཡོན་ཏན་དྲངས་ནས་རང་གི་བྱིས་པའི་སྐྱོན་བརྗོད་པ་དེས་བྱིས་པའི་རང་བཀུར་དང་བརྩོན་སེམས་གཅོག་པར་བྱེད། དེ་ལྟར་ཕ་མའི་གདེང་འཇོག་ཐོབ་དཀོན་པའི་བྱིས་པ་ནི་ཡུན་གྱིས་རང་བཀུར་དང་རང་རྟོན་གྱི་སེམས་ཆག་སྟེ། གཤིས་ཀ་གྱོང་ལ་གཞན་དང་འབྲེལ་འདྲིས་བྱེད་པར་མི་དགའ་བ་ཞིག་ཏུ་འགྱུར་བ་རེད།