བསོད་ནམས་སྐྱིད། དམའ་གསུམ་འཛིན་གྲྭ་བརྒྱད་པ།
ཁྲུང་ཁྲུང་སྔོ་བསངས་མཁའ་རུ་རྩེན།།
བསིལ་འཇམ་རླུང་བུ་དལ་གྱིས་ལྡང་།།
སྦྲང་ཆར་ཟིལ་མས་འཁྲུས་བྱས་པའི།།
དཔྱིད་དཔལ་སྒེག་མོའི་གོམ་སྒྲ་ཐོས།།
ནེའུ་གསིང་སྤངས་ལྗོངས་ཡངས་པོ་རུ།།
ཕྱུགས་རིགས་སྣ་ཚོགས་བག་ཡངས་རྒྱུ།།
མེ་ཏོག་ཕྲ་ཚོམ་བརྒྱན་བྱེད་པའི།།
དཔྱིད་དཔལ་སྒེག་མོས་གོས་ལྗང་གྱོན།།
བྱེའུ་ཀྱུར་ཀྱུར་སྐད་སྒྲོག་ཅིང་།།
བུང་བའི་དར་དིར་གླུ་དབྱངས་ལེན།།
རྩི་ཤིང་ལྡེམ་ལྡེམ་གར་བྱེད་པའི།།
དཔྱིད་དཔལ་སྒེག་མོའི་འཛུམ་ཞལ་ངོམས།།