དཔལ་ཆེན་རྡོ་རྗེ། ༼ཁ་བ།༽ ལོ་རབས་དགུ་བཅུ་བའི་སྟོད་ཀྱི་དགུན་ཁ་ཞིག་ལ་རྩེ་ཆུའི་བྱང་རྒྱུད་ཀྱི་རྭ་ཚང་ཞེས་པའི་འབྲོག་སྡེ་ཞིག་ཏུ་སྐྱེས། རྩོམ་འབྲི་དང་པར་ལེན་གྱི་ལས་ལ་མོས་པ་ཤུགས་ཆེ་བས།སློབ་གྲྭར་འགྲིམས་པའི་གོ་རིམ་བར་ནས་སྙན་ངག་དང་རྩོམ་ཡིག་ཐར་ཐོར་རེ་ཞིང་ཆེན་ཕྱི་ནང་གི་དྲ་དེབ་ཚགས་གསུམ་དུ་བཀོད་མྱོང་། པར་ལེན་གྱི་ལས་འདི་ནི་ཁོ་བོར་མཚོན་ན་ལས་རིགས་གསར་བ་ཞིག་ལ་དུངས་ཞེན་གྱིས་ཚོད་ལྟ་བྱེད་པ་ལྟར་སྣང་ལ། སྤྱིར་སྒྱུ་རྩལ་ལས་རིགས་ཤིག་ལ་དུངས་བ་ཤོར་བ་དེའང་མཐར་དེད་ན་དད་མོས་རིགས་ཤིག་ཏུ་བསམ། རང་བྱུང་ཁམས་ཆེན་མོའི་ཕྱི་ནང་གསང་གསུམ་གྱི་མཛེས་སྡུག་གི་ཆ་རེ་རེ་དང་བྱ་དངོས་ཀྱི་གསལ་ལ་མི་གསལ་བའི་མཚར་སྡུག་གི་ངོས་རེ་རེ་པར་དུ་བླངས་ནས་ཉེ་བར་བཅར་བ་ནི་ལྗོངས་ཁམས་དང་བྱ་དངོས་གང་དེར་བརྩེ་བ་འཛིན་སྟངས་གཞན་ཞིག་ཡིན་པར་སེམས་པས། ཁོ་བོས་པར་ནི་སྨྲ་བ་མེད་པའི་སྙན་ངག་ཡག་ཤོས་ཤིག་ཏུ་སྙམ་མོ།།