རྩེ་ཁོག་རྫོང་ནུབ་ཁུལ་མི་རིགས་སློབ་འབྲིང་གི་བསྡུས་འཕྲིན།
泽库县西部民族中学
简 报
སྤྱི་ཨང 8 པ།
རྩེ་ཁོག་རྫོང་ནུབ་ཁུལ་མི་རིགས་སློབ་འབྲིང་གི་ཀུན་སྤྱོད་ཁང་། 2021ལོའི་ཟླ4པའི་ཚེས2ཉིན།
--------------------------------------------------------------------------------------------------------------------
རྩེ་ཁོག་རྫོང་ནུབ་ཁུལ་མི་རིགས་སློབ་འབྲིང་ནས་འཛིན་བདག་བྱ་བའི་ཉམས་མྱོང་བརྗེ་རེས་སམ་བསམ་ཚུལ་མཉམ་སྤྱོད་ཀྱི་ཚོགས་འདུ་བསྡུས།
སྤྱི་ཟླ4པའི་ཚེས1ཉིན་གྱི་ཉིན་གུང་དུས་ཚོད་གཉིས་དང་ཕྱེད་ཀའི་སྟེང་། རྩེ་ཁོག་རྫོང་ནུབ་ཁུལ་མི་རིགས་སློབ་འབྲིང་གི་ཀུན་སྤྱོད་ཁང་གི་གཙོ་སྒྲུབ་བྱས་པའི་སྐབས་དང་པོའི་འཛིན་བདག་བྱ་བའི་ཉམས་མྱོང་བརྗེ་རེས་དང་བསམ་ཚུལ་མཉམ་སྤྱོད་ཀྱི་ཚོགས་འདུ་སློབ་གྲྭའི་རིག་གཞུང་སྙན་ཞུ་ཁང་ནས་བསྡུས།
ཐེངས་འདིའི་ཚོགས་འདུའི་སྟེང་སློབ་གྲྭའི་འགོ་ཁྲིད་ཚན་ཁག་གཙོ་བྱས་འཛིན་བདག་ཡོངས་ཞུགས་པ་དང་། ཀུན་སྤྱོད་ཁང་གི་ཀྲུའུ་རིན་རྒན་པདྨ་རིན་ཆེན་གྱིས་ཚོགས་འདུར་འགོ་འཛིན་བྱས་པ་དང་། ཚོགས་འདུའི་སྟེང་འཛིན་གྲྭ་སོ་སོའི་འཛིན་བདག་དག་གིས་དགེ་རྒན་གྱི་ལས་རྐང་འདིར་འཐམས་ནས་འཛིན་བདག་གི་བྱ་བ་གཉེར་བའི་གོ་རིམ་ཁྲོད་རང་རང་གི་ངོས་ནས་ཐབས་ལམ་གང་འདྲ་ཞིག་ལ་བརྟེན་ནས་འཛིན་གྲྭར་དོ་དམ་བདག་གཉེར་གནང་སྟངས་ཐད་ནས་ཉམས་མྱོང་དང་བསམ་ཚུལ་སྦ་གསང་མེད་པར་མཉམ་སྤྱོད་བྱས།
ཚོགས་འདུའི་སྟེང་གཙོ་བོ་འཛིན་བདག་ཞིག་ལ་ལྡན་དགོས་པའམ་མེད་དུ་མི་རུང་བའི་བསམ་བློ་དང་རང་འཛིན་གྲྭར་ཚད་ལྡན་གྱི་སྒྲིག་ལམ་བཟོ་སྟངས། སློབ་མ་དང་ཉེ་བར་བཅར་ནས་སློབ་མའི་ཕྱོགས་ཡོངས་ལ་རྒྱུས་ལོན་བྱ་སྟངས་དང་སློབ་སྦྱོང་གི་འདུན་པ་ཇེ་དྲག་ཏུ་གཏོང་སྟངས། འཛིན་བདག་སློབ་མའི་མིག་དཔེར་རུང་བ་ཞིག་ཇི་ལྟར་བྱ་ཚུལ། གཞན་ཡང་སློབ་མའི་སེམས་ཁམས་དང་འབྲེལ་ནས་ཁྱིམ་ཚང་དང་འཚོ་བའི་གནས་ཚུལ་ལ་རྒྱུས་ལོན་བྱེད་པ། འཛིན་གྲྭའི་སྐྱོར་དཔོན་ལེགས་པོ་ཞིག་བདམས་ཤེས་རྒྱུ་གལ་ཆེ་བ། འཛིན་བདག་ལ་ཐབས་ཤེས་དང་སྡུག་རུས་གཉིས་ཀ་ཡོད་དགོས་པ་སོགས་ཀྱི་ཐད་ནས་རང་རང་འཕྲད་པའི་གནད་དོན་དང་ཐག་གཅོད་གནང་སྟངས་སོགས་དེར་འདུས་ཀྱི་དགེ་གྲོགས་ཡོངས་ལ་མཉམ་སྤྱོད་བྱས་པས་བློ་བསྐྱེད་མི་དམན་པ་ཞིག་ཐོབ།
མཇུག་མཐར། སློབ་གཙོ་གཞོན་པ་རྡོ་རྗེ་དབང་རྒྱལ་གྱིས་འཛིན་བདག་ཡོངས་ལ་ལྷག་བསམ་ཟོལ་མེད་ཀྱིས་བཀའ་དྲིན་དང་བཅས་མུ་མཐུད་རང་རང་གི་ལས་རྐང་ནས་འབད་བརྩོན་ལྷུར་ལེན་གནང་བའི་རེ་སྨོན་དང་བཅས་ཚོགས་འདུའི་མཇུག་བསྡུས།
------------------------------------------------------------
འབུལ་ཡུལ། རྫོང་སློབ་གསོའི་ཏང་ཨུ། རྫོང་སློབ་གསོ་ཅུའུ། ཡུལ་ཚོ་ཏང་ཨུ། ཡུལ་ཚོ་སྲིད་གཞུང་།
སྐྱེལ་ཡུལ། སློབ་གྲྭའི་གཞུང་སྒྲུབ་ཁང་སོ་སོ།
(ཚགས་ཡིག)1ཚར10དཔར།
------------------------------------------------------------